"PAŞA Bank" yeni holdinqə keçdi: Növbə sığortadadırmı?

"PAŞA Holding" MMC-yə məxsus "PAŞA Bank" ASC-dəki 56,8195%-lik pay 12 may 2026-cı ildə "PAŞA Maliyyə Holdinqi" MMC-yə ötürülüb. Banker.az-ın məlumatına görə, hazırda bankın səhmlərinin təxminən 53,97%-i "PAŞA Maliyyə Holdinqi"nə, 26,77%-i "Bless" MMC-yə, 9,5%-i Arif Paşayevə, 4,76%-i Mir Camal Paşayevə məxsusdur. Bakı Fond Birjasında sərbəst dövriyyədə olan səhmlərin payı isə 5% təşkil edir.

Rəqəmlər bir-biri ilə uzlaşır: 56,82%-lik pay IPO-dan əvvəlki paya uyğun gəlir. IPO nəticəsində yeni investorların payı 5%-ə çatdıqdan sonra bu göstərici təxminən 53,97%-ə enib. Payın ötürülməsi planı emissiya prospektində əvvəlcədən açıqlanmışdı. Yəni bu, gözlənilməz addım deyil, qrupdaxili restrukturizasiyadır.

ƏSAS SUAL: SIĞORTA HARADA OLACAQ?

Bunu da oxuyun: Kalkulyator 2018-ci ildən var idi: Yeni xidmət sürücüyə əslində nəyi göstərir?

"PAŞA Maliyyə Holdinqi" 2025-ci ilin dekabrında təsis edilib və PAŞA Qrupunun maliyyə xidmətləri, maliyyə texnologiyaları, elektron ticarət və texnologiya istiqamətlərindəki bizneslərini vahid korporativ mərkəz altında birləşdirir.

PAŞA Qrupuna bank ilə yanaşı "PAŞA Sığorta" və "PAŞA Həyat Sığorta" şirkətləri də daxildir. "Maliyyə xidmətləri vahid mərkəzdə" deyilirsə, növbəti sual təbiidir: sığorta şirkətlərinin payları da yeni holdinqə ötürüləcəkmi? Açıqlanan məlumatda sığorta şirkətlərinin adı çəkilmir və bu barədə rəsmi məlumata rast gəlmədik.

SIĞORTALI ÜÇÜN NƏ DEMƏKDİR?

Bank və sığorta şirkətinin eyni maliyyə mərkəzində cəmlənməsi dünyada geniş yayılmış modeldir. Müsbət tərəfi aydındır: güclü kapital, vahid strategiya, rəqəmsal xidmətlərin inteqrasiyası.

Lakin sığortalı baxımından cavab gözləyən məqamlar da var: - Kredit götürən müştəriyə sığorta təklif edilərkən onun başqa sığorta şirkətini seçmək hüququ real olaraq qorunacaqmı? - Bank kanalında satılan sığorta məhsullarında komissiya və qiymət şəffaflığı necə təmin olunacaq? - Müştəri məlumatlarının qrup şirkətləri arasında paylaşılması hansı qaydalarla tənzimlənəcək? - Bir qrupda cəmləşmə bazarda rəqabətə necə təsir edəcək?

Bank güclü nəticələr göstərir: 2026-cı ilin ilk yarısında 96,5 milyon manat xalis mənfəət, iyun ayının sonuna təxminən 10 milyard manat aktiv, 4 milyard manatdan çox kredit portfeli və 1 milyard manata yaxın kapital. Bu miqyasda bir strukturun sığorta şirkətlərini də vahid mərkəzdə toplaması bazara ciddi təsir göstərə bilər.

SUALLARIMIZ

"PAŞA Holding", "PAŞA Maliyyə Holdinqi" və Azərbaycan Mərkəzi Bankına sual ünvanlayırıq:

1. "PAŞA Sığorta" və "PAŞA Həyat Sığorta"nın paylarının "PAŞA Maliyyə Holdinqi"nə ötürülməsi planlaşdırılırmı? Planlaşdırılırsa, hansı müddətdə? 2. Bank və sığorta şirkətləri eyni holdinq altında birləşərsə, kredit müştərisinin sığorta şirkətini sərbəst seçmək hüququ necə qorunacaq? 3. Qrup şirkətləri arasında müştəri məlumatlarının paylaşılması hansı qaydalar çərçivəsində həyata keçiriləcək? 4. Mərkəzi Bank maliyyə qruplarında bank və sığortanın birgə fəaliyyətinə dair əlavə nəzarət tədbirləri nəzərdə tutulurmu?

Aidiyyəti qurum və şirkətlər açıqlama vermək istədikləri təqdirdə, onların mövqeyini dərc etməyə hazırıq.

#PAŞABank #PAŞAHolding #PAŞAMaliyyəHoldinqi #Sığorta #Bankassurance #Azərbaycan #SigortanınSesi